NGAJEGANG JAGAT BALI MALARAPAN ANTUK TRI HITA KARANA

Inggih, suksma aturang titiang, majeng ring pengenter  acara antuk galah sane kapaica ring sikian titiang. Sadurung titiang nglantur matur lugrayang titiang, ngiring ida dane sareng sami nunas ica majeng ring Ida Sang Hyang Widhi Wasa. Malarapan antuk ngaturang pangastungkara. “Om swastyastu”

Inggih ida dane sareng sami, sane wangiang titiang ring galahae sane becik puniki, angayu bagia pisan manah titiange, riantukan sangkaning asung kerta waranugraha Ida Sang Hyang Widhi,presida titiang matemu wedana sareng ida dane sami, gumanti ngaturang dharma wacana ring rahinane mangkin. Mungguing dharma wacana sane jagi aturang titiang, inggih punika : Ngajegang Jagat Bali malarapan antuk Tri Hita Karana.

Ring tepengane mangkin titiang wantah matetegar mapikeling ring ida dane, pamekas ring para yowana, mogi mogi napi sane uningayang titiang wenten pikenoh nyane. Ida dane, yening maosang indik Tri Hita Karana punika kawangun antuk tigang kruna inggih punika Tri Hita miwah Karana. Tri mateges tiga, hita mateges bagia , karana mateges sane ngawinang. Artos sejangkep nyane inggih punika tigang soroh sane ngawinang bagia. Tigang sorohe punika wantah parhyangan, pawongan, miwah palemahan. Punika patut uratiang mangda ajeg jagat bali ring genah punika sane presida ngawit sekancan karma. Ida dane sareng sami sane mangkin titiang jagi metaken; napi mawinan jagat bali sane alit puniki prasida kaloktah ke dura Negara ? ida dane manawi sampun pawikan, boya je tios sane ngawinang. Inggih punika sane kapertama indik budaya meyadnya sane nyihnayang rasa subakti majeng Ida Sang Hyang Widhi majalaran antuk upacara, sane kaping kalih indik paras paros menyama braya, kabaos ramah tamah sane ngawinang rasa welas asih ketah kebaos Bali Shanti. Sane kaping tiga indik keasrian jagat bali sane tan mari nuduk kayun lan ngulangunin. Yening selahang titiang ring sastra agama hindu, punika maka pah-pahan Tri Hita Karana. Ida dane yening maosang ngajegang jagat bali malarapan antuk Tri Hita Karana punika wantah mikukuhin jagat bali malarapan mikukuhin ajaran Tri Hita Karana, napi mawinan titiang ngaturang indike puniki napi ke Tri Hita Karana sampun nenten ajeg kemargiang ring bali? Sayuwakti ajahan punika sampun nyusup ring kahuripan para janane sakewanten akeh pikobet nyane sane ngawinang sayan rered pikayun para janane jagi ngelimbakang Tri Hita Karana ne puniki. Napi pikobete punika? Inggih lugrayang titiang ngetah punika. Sane kapertama indik parhyangan. Parhyangan wantah paiketan sang rumaga brahmana majeng ring Ida Sang Hyang Widhi Wasa riantukan jagat miwah sedaging nyane punika sami wantah pemargin Ida Sang Hyang Widhi masrana antuk yadnya. Indike punika mungguh ring Bhagawan Gita Aji Ayat III Sloka X inggih punika :

(Sahayajnah prajah srishtva puro, vacha prajapatih anena prasavishya dhvam esha vo, stv ishta kamadhuk)

Sane mapiteges : duk rihin Sang Hyang Prajapati utawi Sang Hyang Widhi sane ngardi jagate puniki mesrana antuk yadnya. Sane mangkin sampun sepatutnyane iraga sane meyadnya maka penaur utang majeng ring Ida Sang Hyang Widhi. Sakewanten yening uratiang ring kahuripan para janane ring Bali ngenenin indik meyadnya, punika kaanggen wantah masrana antuk banten sane ageng kemanten. Nika mawinan akeh para janane setata mautsaha mekarya banten yadiastun majalaran antuk utang, memaling, miwah sane tiosan. Swadarma sane pinih utama nenten kauratiang becik, riantukan wantah mesrana antuk banten kemanten kasengguh sampun prasida nyujur Ida Sang Hyang Widhi. Ida dane boya je mesrana antuk banten kemanten iraga prasida ngaturang bhakti, sakewanten mangda presida kadulurin antuk parilaksana sane patut manut ring sastra agama punika taler kadulurin antuk manah sane lascarya minakadi setata mapitulung ring anake tiwas, maka dadosan preti sentana putra sane suputra miwah sane lianan. Yening sampun presida melaksana kadi asapunika pacang presida nyujur Ida Sang Hyang Widhi.

Inggih, ida dane sareng sami sane wangiang titiang, lanturang titiang sane kaping kalih indik pawongan. Pawongan wantah paiketan kramane paras paros majeng ring semeton karma sane tiosan kekawitin antuk Tat Twam Asi. Ring jagate sekadi mangkin ngenenin indik menyama braya sampun sayan rered turmaning parilaksana sane nulurin dewek pedidi nike sane kawangge. Ring jagate sekadi mangkin akeh anake maparilaksana nenten ngeratiang anake tiosan minakadi korupsi,kolusi, nepotisme sane sayan nincap, sios malih mamati-mati jadma tanpa itungan sekadi wicara sane wenten ring Klungkung, inggih punika wenten jadma sane lascarya maparilaksana mutilasi utawi mukang-mukang jadma siosan, bilih-bilih jadma punika nenten sios wantah gelan ipun. Wenter taler  merebat sareng pasemetonan, sangkaning megarang tanah,megarang waris, miwah megarang setra. Punika sami riantukan paiketan para janane jagi nelebang indik pawongan kantun ka kutang. Sepatut nyane yening dados jadma, dharmane sane kamargiang mangda madue kawigunan ring jagate, sekadi sane mungguh ring Sarassamuscaya Sloka XVI inggih punika :

(Kadi karma sang hyang Aditya, an wijil, humilangken petengning rat, mangkana tikang wwang mulahakening dharma, an hilangaken salwiring papa.)

Sane mapiteges sekadi pamargin Sang Hyang Surya ngawit medal ngicalang teked jagate, kadi asapunika anake sane setata ngelaksanayang dharma pacang presida ngicalang sekancan pikeling yening sampun presida iraga kadi asapunika janten paiketan pasemetonan iraga setata becik.

Inggih, ida dane lugrayang titiang jagi ngaturang sane kaping tiga indik palemahan. Palemahan punika wantah paiketan kramane majeng ring wewidangannyane. Jagat miwah sedaging nyane punika sami wantah kekardinin olih Ida Sang Hyang Widhi riantukan ida polih gelar utpeti, stiti, miwah praline jagate puniki. Tan bina sekadi lembu sane setata ngamedalang empehan sane ten pegat-pegat kaperes olih kramane tur kabukti. Wantah kadi asapunika jagate sane setata mapaica panugrahan minakadi ajengan utawi pangan sane melakar antuk pantun, umah utawi papan sane melakar antuk taru, penganggen titinge mangkin punika taler pengangge ida dane sareng sami sane melakar antuk kapas. Indayang je kayunne mangkin manawita sami daging gumi inucap kaicalang janten: i manusa, beburon, entik-entikan pacang pateh. Nike mawinan sampunang ngawag-ngawag nerbak alas, nube ulam, ngentungang luhu sane mawiguna sane presida ngranayang sungkan. Ngiring iraga nulad pemargin Sang Pandawa sane mungguh ring cerita Mahabrata sampun napi utsaha ida kesarengin olih Drupadi ring kalaning jagat astina kepah dados kalih ida sang Pandawa ngemolihang genah sane panes ngentak sakewanten prasida kawangun jagat Indra Prasta sane becik tur ngulangunin. Punika sangkaning utsaha ida sareng sami. Sane mangkin ngiring iraga sane mautsaha yening nenten iraga sire malih?. Yening baosang abot sing ngerti abot, sakewanten yening sampun kadulurin antuk manah lascarya janten prasida kamargiang.

Inggih ida dane sareng sami yening cutetang titiang daging dharma wacana I wawu inggih punika Tri Hita Karana patut limbakang, kakukuhang mangda jagat miwah sedaging nyane presida nemu bagia genah linggah becik kacingak. Sekadi tatujon agama hindu Moksartam jagaditha yaca iti dharma inggih punika nemu bagia sekala niskala kadasarin antuk dharma.

Inggih ida dane sareng sami sane wangiang titiang, wantah kadi asapunika titiang presida matur ring rahinane mangkin. Mogi-mogi wenten pikenoh ipun ring sajeroning kahuripan manawita wenten atur titiang sane nenten manut ring arsa titiang nunas geng rena sinampura riantukan tan hana wong swasta analus, nenten wenten jadma sane patut. Maka wasananing atur puputang titiang antuk ngaturang parama shanti. Om Shantih Shantih Shantih Om.